એકતાનગરમાં રાષ્ટ્રીય એકતા દિવસની ઉજવણી, PM મોદીના વિપક્ષ પર પ્રહાર: ‘વિરોધ પક્ષ નહીં, અવરોધ પક્ષ બની ગયો છે’

સરદાર પટેલની 151મી જન્મજયંતીએ વડાપ્રધાને દેશવાસીઓને એકતાના શપથ લેવડાવ્યા, નક્સલવાદ સામેની લડાઈને પરેડ અને સાંસ્કૃતિક પ્રસ્તુતિમાં સ્થાન અપાયું

એકતાનગર: સરદાર વલ્લભભાઈ પટેલની 151મી જન્મજયંતી નિમિત્તે ગુજરાતના એકતાનગરમાં રાષ્ટ્રીય એકતા દિવસની ભવ્ય ઉજવણી કરવામાં આવી હતી. વડાપ્રધાન નરેન્દ્ર મોદીની ઉપસ્થિતિમાં યોજાયેલા કાર્યક્રમમાં દેશની એકતા અને અખંડિતતાનો સંદેશ આપવામાં આવ્યો હતો. વડાપ્રધાને ઉપસ્થિત લોકોને રાષ્ટ્રીય એકતાના શપથ લેવડાવ્યા હતા. આ પ્રસંગે સુરક્ષા દળોની શિસ્તબદ્ધ પરેડ, વિવિધ રાજ્યોની પોલીસ ટુકડીઓની ભાગીદારી અને સાંસ્કૃતિક પ્રસ્તુતિઓ મુખ્ય આકર્ષણ રહ્યાં હતાં.

જોકે, કાર્યક્રમ દરમિયાન વડાપ્રધાનના રાજકીય નિવેદનો પણ ચર્ચાનું કેન્દ્ર બન્યાં હતાં. વિપક્ષ પર નિશાન સાધતાં મોદીએ કહ્યું હતું કે દેશનો વિપક્ષ પોતાની જવાબદારી ભૂલી ગયો છે અને હવે ‘વિરોધ પક્ષ’ નહીં, પરંતુ ‘અવરોધ પક્ષ’ બની ગયો છે. તેમના જણાવ્યા અનુસાર, વિપક્ષ દેશના વિકાસના માર્ગમાં અડચણો ઊભી કરી રહ્યો છે અને તેણે અવરોધની રાજનીતિને પોતાની મુખ્ય રાજનીતિ બનાવી લીધી છે.

વડાપ્રધાને વધુમાં આક્ષેપ કર્યો હતો કે કેટલીક શક્તિઓ સતત દેશમાં વિભાજન ઊભું કરવાનો પ્રયાસ કરી રહી છે. તેમણે વિદેશમાં ભારત વિરોધી તાકાતો સાથે સંપર્ક અને દેશવિરોધી તત્ત્વો જેવી ભાષા બોલવાના મુદ્દે પણ સવાલો ઉઠાવ્યા હતા. આવી શક્તિઓ સામે દેશે એકજૂથ રહેવાની જરૂરિયાત પર તેમણે ભાર મૂક્યો હતો.

‘ભારતની વિવિધતા જ તેની એકતાનો આધાર’

સરદાર પટેલના યોગદાનને યાદ કરતાં વડાપ્રધાને કહ્યું હતું કે સરદાર પટેલ ભારતની સંસ્કૃતિ, ચરિત્ર અને ચેતનાને સારી રીતે સમજતા હતા. તેઓ જાણતા હતા કે દેશની વિવિધતા તેની નબળાઈ નહીં, પરંતુ એકતાનો વાસ્તવિક આધાર છે. સરદાર પટેલે દેશને માત્ર ભૌગોલિક રીતે એક કર્યો નહોતો, પરંતુ લોકોને ભાવનાત્મક એકતાના સૂત્રમાં પણ બાંધ્યા હતા.

મોદીએ કહ્યું હતું કે સરદાર પટેલના યોગદાન વિના આજના ભારતની કલ્પના કરવી મુશ્કેલ છે. વિભાજન પછી દેશની અખંડિતતા જાળવવામાં અને રાષ્ટ્રીય એકતાનો પાયો મજબૂત કરવામાં તેમની ભૂમિકા ઐતિહાસિક રહી છે.

વૈશ્વિક ઊર્જા સંકટ વચ્ચે ભારતની ક્ષમતાનો ઉલ્લેખ

વડાપ્રધાને તાજેતરના વૈશ્વિક ઊર્જા સંકટનો ઉલ્લેખ કરતાં કહ્યું હતું કે દુનિયાના અનેક દેશો પેટ્રોલિયમ સંકટનો સામનો કરી રહ્યા હતા. કેટલાક દેશોમાં પેટ્રોલ અને ડીઝલની ખરીદી પર મર્યાદા મૂકવાની સ્થિતિ ઊભી થઈ હતી. ભારત સામે પણ ગંભીર સંકટ ઊભું થવાની આશંકા વ્યક્ત કરવામાં આવી હતી. જોકે, ભારતે આ વૈશ્વિક સંકટની અસર સામાન્ય નાગરિકો પર ન પડે તે માટે પોતાની ક્ષમતા દર્શાવી છે.

નક્સલવાદ સામેની લડાઈને પરેડમાં સ્થાન

આ વર્ષની એકતા પરેડમાં દેશમાંથી સશસ્ત્ર નક્સલવાદના ખાતમાની કામગીરીને વિશેષ સ્થાન આપવામાં આવ્યું હતું. પરેડમાં BSF, CRPF, CISF, ITBP અને SSB સહિતના કેન્દ્રીય સશસ્ત્ર પોલીસ દળોની ટુકડીઓએ ભાગ લીધો હતો. નક્સલવાદ સામેની કામગીરીમાં મહત્ત્વપૂર્ણ ભૂમિકા ભજવનાર વિવિધ રાજ્યોની પોલીસ ટુકડીઓ પણ પરેડમાં જોડાઈ હતી.

નેશનલ સ્કૂલ ઑફ ડ્રામા દ્વારા ‘નક્સલ મુક્ત ભારત’ વિષય પર વિશેષ નાટ્ય પ્રસ્તુતિ કરવામાં આવી હતી. તેમાં વામપંથી ઉગ્રવાદથી પ્રભાવિત રહેલા 126 જિલ્લાઓના આશરે 2,000 કલાકારોએ ભાગ લીધો હતો. આ પ્રસ્તુતિ દ્વારા નક્સલવાદ સામેની લડાઈ અને તેનાથી સંબંધિત સામાજિક પરિવર્તનને રજૂ કરવાનો પ્રયાસ કરવામાં આવ્યો હતો.

સ્ટેચ્યૂ ઑફ યુનિટી પર પુષ્પવર્ષા

રાષ્ટ્રીય એકતા દિવસના કાર્યક્રમ પહેલાં વડાપ્રધાન નરેન્દ્ર મોદીએ સ્ટેચ્યૂ ઑફ યુનિટી ખાતે સરદાર વલ્લભભાઈ પટેલને પુષ્પાંજલિ અર્પણ કરી હતી. ભારતીય વાયુસેનાના બે હેલિકોપ્ટર દ્વારા પ્રતિમા પર પુષ્પવર્ષા કરવામાં આવી હતી. સવારે દેશભરમાં ‘રન ફોર યુનિટી’નું આયોજન થયું હતું, જેમાં લાખો લોકોએ ભાગ લઈને રાષ્ટ્રીય એકતાનો સંકલ્પ વ્યક્ત કર્યો હતો.